B.G 10.42
अथवा बहुनैतेन किं ज्ञातेन तवार्जुन। विष्टभ्याहमिदं कृत्स्नं एकांशेन स्थितो जगत् ॥४२॥
Gīta Bhāshya 10.42
किं इति वक्ष्यमाणप्राधान्यज्ञापनार्थम्। न तु उक्त निष्फलत्वज्ञापनाय। तथा सति नोच्येत।
"अज्ञात्वैवं सर्वविशेषयुक्तं देवं परं को विमुच्येत बन्धात्।"
इति ऋर्ग्वेदखिलेषु।
त्वं तु बहुफलप्राप्तियोग्यः इति तव एति विशेषणम्। अन्य स्तुत्यर्थत्वेन प्रसिद्धश्च एकत्र किंशब्दः -
"रागद्वेषौ यदि स्यातां तपसा किं प्रयोजनम्। तावुभौ यदि न स्यातां तपसा किं प्रयोजनम्॥"
इत्यादौ।
प्राधान्यं च सिद्धमेकत्र दर्शनात् सर्वत्र भगवद्दर्शनस्य "यो मां पश्यति सर्वत्र" इत्यादौ ॥४२॥
॥ इति श्रीमदानन्दतीर्थभगवत्पादाचार्यविरचिते श्रीभगवद्गीताभाष्ये दशमोध्यायः ॥
Gīta Tātparya 10.42
"किं ज्ञातेन" इति वक्ष्यमाणस्य अधिकफलत्वज्ञापकमेव। अन्यथा उक्तेः एव वैयर्थ्यात्।
"अन्याधिक्यज्ञापनार्थं शुभं चाक्षिप्यते क्वचित्। न तावतास्य निन्द्यत्वं ज्ञेयैवान्यवरिष्ठता। उभयं मिलितं चैव ततोऽप्यधिकशोभनम्॥"
इति च ॥४२॥
॥ इति श्रीमदानन्दतीर्थभगवत्पादाचार्यविरचिते श्रीभगवद्गीतातात्पर्यनिर्णये दशमोध्यायः ॥
॥ ओं तत्सदिति श्रीमद्भगवद्गीतासु उपनिषत्सु ब्रह्मविद्यायां योगशास्त्रे श्रीकृष्णार्जुनसंवादे विभूतियोगो नाम दशमोध्यायः ॥
