B.G 7.07
मत्तः परतरं नान्यत् किञ्चिदस्ति धनञ्जय। मयि सर्वमिदं प्रोतं सूत्रे मणिगणा इव ॥७॥
Gīta Bhāshya 7.07
अहमेव परतरः। मत्तः अन्यत् परतरं न किञ्चिदपि ॥७॥
Gīta Tātparya 7.07
मत्तोऽन्यत् परतरं नास्ति। परतरस्त्वहमेवेत्यर्थः। अन्यथा अन्यदिति व्यर्थम्।
"अवरा दुःखसम्बन्धात् जीवा एव प्रकीर्तिताः। नित्यनिर्दुःखरूपत्वात् परा श्रीरेकलैव तु॥ दुःखासम्पीडितत्वात्तु मध्यमो वायुरुच्यते। अनन्याधीनरूपत्वादसमाधिकसौख्यतः॥
तत्तन्त्रत्वाच्च सर्वस्य स विष्णुः परतमो मतः। अभावादन्तराऽन्यस्य त्विहैकार्थौ तरप्तमौ॥ यस्याः सम्बन्धयोग्यत्वात् जीवा अप्यवरा मताः। तस्या जडायाः प्रकृतेरवरत्वे क्व संशयः॥
अथावरतरा ये तु विमुखाश्चेतना हरेः। नित्यदुःखैकयोग्यत्वात् न ह्येतत् स्यादचेतने॥ अतः परतरं विष्णुं यो वेत्ति स विमुच्यते। मुक्तस्तु स्यात् पराभासः सुनित्यसुखभोजनात्॥
तत्रापि तारतम्यं स्यात् तेषु ब्रह्माऽधिको मतः। विष्णोराधिक्यसंवित्तिः सर्वस्मात् ज्ञानमुच्यते॥ एवं विविच्य तज्ज्ञानं विज्ञानमिति कीर्तितम्। एतच्च तारतम्येन वर्तते केशवादिषु॥"
(- states the testimonial.)
मुख्यविज्ञान्यतो विष्णुः किञ्चिद्विज्ञानिनोऽपरे ॥७॥
