yasmin sarvāṇi karmāṇi saṁnyasyādhyātmacetasā। nirāśīrnirmamo yāti paraṁ jayati socyutaḥ॥1॥

smr̥tvā viṣṇuṁ samutthāya kr̥taśauco yathāvidhi। dhautadantaḥ samācamya snānaṁ kuryād vidhānataḥ ॥2॥

uddhr̥teti mr̥dālipya dviṣaḍaṣṭaṣaḍakṣaraiḥ। trirnimajyāpyasūktena prokṣayitvā punastataḥ। mr̥dālipya nimajya tristrirjapedaghamarṣaṇam ॥3॥

sraṣṭāraṁ sarvalokānāṁ smr̥tvā nārāyaṇaṁ param। yataśvāso nimajyāpsu praṇavenotthitastataḥ। siñcat puruṣasūktena svadehasthaṁ hariṁ smaran ॥4॥

vasitvā vāsa ācabhya prokṣyācamya ca mantrataḥ। gāyatryā cāñjaliṁ datvā dhyātvā sūryagataṁ harim ॥5॥

mantrataḥ parivr̥tyātha samācamya surādikān। tarpayitvā nipīḍyātha vāso vistr̥tya cāñjasā ॥6॥

arkamaṇḍalagaṁ viṣṇuṁ dhyātvaiva tripadīṁ japet। sahasraparamāṁ devīṁ śatamadhyāṁ daśāvarām ॥7॥

āsūryadarśanāttiṣṭhettatastūpaviśeta vā। pūrvāṁ sandhyāṁ sanakṣatrāmuttarāṁ sadivākarām। uttarāmupaviśyaiva vāgyataḥ sarvadā japet ॥8॥

dhyeyaḥ sadā savitr̥maṇḍalamadhyavartī nārāyaṇaḥ sarasijāsanasanniviṣṭaḥ। keyūravān makarakuṇḍalavān kirīṭī hārī hiraṇmayavapurdhr̥taśaṅkhacakraḥ ॥9॥

gāyatryāstriguṇaṁ viṣṇuṁ dhyāyannaṣṭākṣaraṁ japet। praṇamya devānviprāṁśca gurūṁśca haripārṣadān। evaṁ sarvottamaṁ viṣṇuṁ dhyāyannevārcayeddharim ॥10॥

dhyānapravacanābhyāṁ ca yathāyogyamupāsanam। dharmeṇejyāsādhanāni sādhayitvā vidhānataḥ। snātvā sampūjayedviṣṇuṁ vedatantroktamārgataḥ ॥11॥

vaiśvadevaṁ baliṁ caiva kuryānnityaṁ tadarpaṇam। iṣṭaṁ dattaṁ hutaṁ japtaṁ pūrtaṁ yaccātmanaḥ priyam। dārānsusānpriyānprāṇān parasmai sannivedayen ॥12॥

bhuktaśeṣaṁ bhagavato bhr̥tyātithipurassaraḥ। bhuñjīta hr̥dgataṁ viṣṇuṁ smaraṁstadgatamānasaḥ। ācamya mūlamantreṇa koṣṭhaṁ svamabhimantrayet ॥13॥

vedaśāstravinodena prīṇayan puruṣottamam। ahaḥśeṣaṁ nayetsandhyāmupāsītātha pūrvavat ॥14॥

yāmātparata evātha svapeddhyāyan janārdanam। antarāle tato buddhvā smareta bahuśo harim ॥15॥

kāyena vācā manasendriyairvā buddhyātmanā vānusr̥tassvabhāvam। karoti yadyatsakalaṁ parasmai nārāyaṇāyeti samarpayettat ॥16॥

dvāvimau puruṣau loke kṣaraścākṣara eva ca। kṣaraḥ sarvāṇi bhūtāni kūṭasthokṣara ucyate ॥17॥

uttamaḥ puruṣastvanyaḥ paramātmetyudāhr̥taḥ। yo lokatrayamāviśya bibhartyavyaya īśvaraḥ ॥18॥

yasmātkṣaramatītohamakṣarādapi cottamaḥ। atosmi loke vede ca prathitaḥ puruṣottamaḥ ॥19॥

yo māmevamasammūḍho jānāti puruṣottamam। sa sarvavidbhajati māṁ sarvabhāvena bhārata॥ 20॥

iti guhyatamaṁ śāstramidamuktaṁ mayānagha। etadbuddhvā budidhamānsyātkr̥takr̥tyaśca bhārata ॥21॥

rudraṁ samāśritā devā rudro brahmāṇamāśritaḥ। brahmā māmāśrito nityaṁ nāhaṁ kañcidupāśritaḥ ॥ 22॥

ye me matamidaṁ nityamanutiṣṭhanti mānavāḥ। śraddhāvantonasūyanto mucyante tepi karmabhiḥ ॥23॥

ye tvetadabhyasūyanto nānutiṣṭhanti me matam। sarvajñānavimūḍhāṁstānvididha naṣṭānacetasaḥ ॥24॥

dvau bhūtasargau lokesmindaiva āsura eva ca। viṣṇubhaktiparo daivo viparītastathāsuraḥ ॥25॥

smartavyaḥ satataṁ viṣṇurvismartavyo na jātucit। sarve vidhiniṣedhāḥ syuretayoreva kiṅkarāḥ ॥26॥

dharmo bhavatyadharmopi kr̥to bhaktaistavācyuta। pāpaṁ bhavati dharmopi yo na bhaktaiḥ kr̥to hareḥ ॥27॥

manmanā bhava madbhakto madyājī māṁ namaskuru। nityaṁ bhavecca manniṣṭho bubhūṣuḥ puruṣassadā ॥28॥

eṣa nityaḥ sadācāro gr̥hiṇo vaninastathā। vaiśvadevaṁ baliṁ dantadhāvanaṁ cāpyr̥te vaṭoḥ ॥29॥

evameva yateḥ svīyavittena tu vinā sadā। mūlamantraiḥ sadā snānaṁ viṣṇoreva ca tarpaṇam ॥30॥

viśeṣo niṣkriyayaterajalāñjalinā tathā। tarpaṇaṁ tu harereva yateranyasya coditam। samiddhōmō vaṭōścaiva smr̥tvā viṣṇuṁ hutāśanē॥31॥

sarvavarṇāśramairviṣṇureka evejyate sadā। ramābrahmādayastasya parivārata eva tu ॥32॥

kaviṁ purāṇamanuśāsitāram aṇoraṇīyāṁsamanusmared yaḥ। sarvasya dhātāramacintyarūpam ādityavarṇaṁ tamasaḥ parastāt ॥33॥

vedāhametaṁ puruṣaṁ mahāntaṁ ādityavarṇaṁ tamasastu pāre। sarvāṇi rūpāṇi vicintya dhīraḥ nāmāni kr̥tvābhivadan yadāste॥ 34॥

dhātā purastādyamudājahāra śakraḥ pravidvānpradiśaścatasraḥ। tamevaṁ vidvānamr̥ta iha bhavati nānyaḥ panthā ayanāya vidyate ॥35॥

ānandatīrthamuninā vyāsavākyasamuddhr̥tiḥ। sadācārasya viṣaye kr̥tā saṅkṣepataḥ śubhā॥ 36॥

aśeṣakalyāṇaguṇanityānubhavasattanuḥ। aśeṣadoṣarahitaḥ prīyatāṁ puruṣottamaḥ ॥37॥

udrutāsi varāhēṇa kr̥ṣṇēna śatabāhunā। mr̥ttikē hara mē pāpaṁ yanmayā duṣkr̥taṁ kr̥taṁ ॥

mr̥ttikē brahmadattāsi kāśyapēnābhimantritā। mr̥ttikē dēhi mē puṣṭiṁ tvayi sarva pratiṣṭitaṁ। tvayā hatēna pāpēna gacchāmi paramāṁ gatim ॥

॥ oṁ namō bhagavatē vāsudēvāya ॥

॥ oṁ namō nārāyaṇāya ॥

॥ oṁ viṣṇavēnamaḥ ॥

āpō hi ṣṭhā mayōbhuvastā na ūrjē dadhātana । mahē raṇāya cakṣasē ॥1॥
yō vaḥ śivatamō rasastasya bhājayatēha naḥ । uśatīriva mātaraḥ ॥2॥
tasmā araṁ gamāma vō yasya kṣayāya jinvatha । āpō janayathā ca naḥ ॥3॥
śaṁ nō dēvīrabhiṣṭaya āpō bhavantu pītayē । śaṁ yōrabhi sravantu naḥ ॥4॥
īśānā vāryāṇāṁ kṣayantīścarṣaṇīnām । apō yācāmi bhēṣajam ॥5॥
apsu mē sōmō abravīdantarviśvāni bhēṣajā । agniṁ ca viśvaśambhuvam ॥6॥
āpaḥ pr̥ṇīta bhēṣajaṁ varūthaṁ tanvē mama । jyōkca sūryaṁ dr̥śē ॥7॥
idamāpaḥ pra vahata yatkiṁ ca duritaṁ mayi । yadvāhamabhidudrōha yadvā śēpa utānr̥tam ॥8॥
āpō adyānvacāriṣaṁ rasēna samagasmahi । payasvānagna ā gahi taṁ mā saṁ sr̥ja varcasā ॥9॥

r̥taṁ ca satyaṁ cābhīddhāttapasō'dhyajāyata । tatō rātryajāyata tataḥ samudrō arṇavaḥ ॥1॥

samudrādarṇavādadhi saṁvatsarō ajāyata । ahōrātrāṇi vidadhadviśvasya miṣatō vaśī ॥2॥

sūryācandramasau dhātā yathāpūrvamakalpayat । divaṁ ca pr̥thivīṁ cāntarikṣamathō svaḥ ॥3॥

sahasraśīrṣā puruṣaḥ sahasrākṣaḥ sahasrapāt । sa bhūmiṁ viśvatō vr̥tvātyatiṣṭhaddaśāṅgulam ॥1॥
puruṣa ēvēdaṁ sarvaṁ yadbhūtaṁ yacca bhavyam । utāmr̥tatvasyēśānō yadannēnātirōhati ॥2॥
ētāvānasya mahimātō jyāyām̐śca pūruṣaḥ । pādō'sya viśvā bhūtāni tripādasyāmr̥taṁ divi ॥3॥
tripādūrdhva udaitpuruṣaḥ pādō'syēhābhavatpunaḥ । tatō viṣvaṅvyakrāmatsāśanānaśanē abhi ॥4॥
tasmādvirālajāyata virājō adhi pūruṣaḥ । sa jātō atyaricyata paścādbhūmimathō puraḥ ॥5॥
yatpuruṣēṇa haviṣā dēvā yajñamatanvata । vasantō asyāsīdājyaṁ grīṣma idhmaḥ śaraddhaviḥ ॥6॥
taṁ yajñaṁ barhiṣi praukṣanpuruṣaṁ jātamagrataḥ । tēna dēvā ayajanta sādhyā r̥ṣayaśca yē ॥7॥
tasmādyajñātsarvahutaḥ sambhr̥taṁ pr̥ṣadājyam । paśūntām̐ścakrē vāyavyānāraṇyāngrāmyāśca yē ॥8॥
tasmādyajñātsarvahuta r̥caḥ sāmāni jajñirē । chandāṁsi jajñirē tasmādyajustasmādajāyata ॥9॥
tasmādaśvā ajāyanta yē kē cōbhayādataḥ । gāvō ha jajñirē tasmāttasmājjātā ajāvayaḥ ॥10॥
yatpuruṣaṁ vyadadhuḥ katidhā vyakalpayan । mukhaṁ kimasya kau bāhū kā ūrū pādā ucyētē ॥11॥
brāhmaṇō'sya mukhamāsīdbāhū rājanyaḥ kr̥taḥ । ūrū tadasya yadvaiśyaḥ padbhyāṁ śūdrō ajāyata ॥12॥
candramā manasō jātaścakṣōḥ sūryō ajāyata । mukhādindraścāgniśca prāṇādvāyurajāyata ॥13॥
nābhyā āsīdantarikṣaṁ śīrṣṇō dyauḥ samavartata । padbhyāṁ bhūmirdiśaḥ śrōtrāttathā lōkām̐ akalpayan ॥14॥
saptāsyāsanparidhayastriḥ sapta samidhaḥ kr̥tāḥ । dēvā yadyajñaṁ tanvānā abadhnanpuruṣaṁ paśum ॥15॥
yajñēna yajñamayajanta dēvāstāni dharmāṇi prathamānyāsan । tē ha nākaṁ mahimānaḥ sacanta yatra pūrvē sādhyāḥ santi dēvāḥ ॥16॥

ōm sūryashcha mā manyushcha manyupatayashcha manyu krutēbhyaḥ| pāpēbhayō rakṣantām। yadpadbhyāmudarēṇa śiśnā। rātri stadavalampatu| yatkiñca duritam mayi| idamaham māmamrutayōnau| sūryē jyōtiśi juhōmisvāhā ॥

oṁ । bhūrbhuvaḥ svaḥ । tatsaviturvarēṇyaṁ । bhargō dēvasya dhīmahi । dhiyō yō naḥ pracōdayāt ॥

uttiṣṭōttiṣṭha gantavyaṁ punarāgamanāyaca uttiṣṭa dēvī sthātavyaṁ praviṣya hr̥dayaṁ mama ॥ oṁ āsōvādityō brahma ॥